ދިވެހިރާއްޖޭގެ އިމާރާތްކުރުމުގެ ދާއިރާ ކުރިއެރުވުމަށް މި ސަރުކާރުން ގެންގުޅުއްވާ ސިޔާސަތުގެ ދަށުން، 206 މަޝްރޫޢު އަމިއްލަ ދިވެހި ކުންފުނިތަކާ ހަވާލުކޮށްފިއެވެ. މި މަޝްރޫޢުތައް ހަވާލުކުރެވިފައިވަނީ ތަރައްޤީގެ މަޝްރޫޢުތައް ޕްރައިވެޓް ކޮންޓްރެކްޓަރުންނާ ހަވާލުކުރުމަށް ބޭއްވި ޚާއްސަ ރަސްމިއްޔާތެއްގައެވެ.

މިއީ ދިވެހި ސަރުކާރަކުން އެއްފަހަރާ އެންމެ ގިނަ މަޝްރޫޢުތައް އަމިއްލަ ކުންފުނިތަކާ ހަވާލުކުރި ތާރީޚީ ދުވަހެއްކަމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވިއެވެ. މި މަޝްރޫޢުތަކަކީ ތަފާތު 53 އަމިއްލަ ކުންފުނިތަކަކަށް ދެވުނު މަސައްކަތްތަކެކެވެ. މި މަޝްރޫޢުތަކާއެކު އިމާރާތްކުރުމުގެ ދާއިރާއަށް ބޮޑު ކުރިއެރުމެއް އަންނާނެކަމަށް ސަރުކާރުން ވިދާޅުވެއެވެ.

މި ރަސްމިއްޔާތުގައި ޖުމުލަ 9 ދާއިރާއަކުން މަޝްރޫޢުތައް ހަވާލުކޮށްފައިވެއެވެ. އެއީ:

މަޝްރޫޢުތައް ޕްރައިވެޓް ކޮންޓްރެކްޓަރުންނާ ހަވާލުކުރުމުގެ ރަސްމިއްޔާތުގައި ވާހަކަފުޅުދައްކަވަމުން ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވީ މިދިޔަ ދެ ދުވަހު ސޮއިކުރި މަޝްރޫޢުތަކާއެކު 216 މަޝްރޫޢު ކުންފުނިތަކާ ހަވާލުކޮށްފައިވާ ކަމަށެވެ. އަދި ރައީސް ފާހަގަކުރެއްވި ގޮތުގައި މިއަދު ހަވާލުކުރެވުނު މަޝްރޫޢުތަކުގެ ތެރޭގައި 13 ރަށެއްގައި 825 ހައުސިން ޔުނިޓު އެޅުމުގެ މަސައްކަތްތައް ހިމެނެއެވެ.

އަމިއްލަ ކުންފުނިތަކަށް ގިނަ އަދަދެއްގެ މަޝްރޫޢުތަކެއް ހަވާލުކުރާނެކަން ރައީސުލްޖުމްހޫރިއްޔާ އިޢުލާންކުރެއްވީ މިދިޔަ މަހުގެ 21 ވަނަ ދުވަހު ލ. ގަމުގެ ރައްޔިތުންނާ ބައްދަލުކުރައްވައި ދެއްކެވި ވާހަކަފުޅުގައެވެ. މީގެ ސަބަބުން އެތައް ކުންފުންޏަކަށް ފައިސާ ލިބޭނެ ގޮތް ހަމަޖެހި، ދިވެހި އެތައް ޢާއިލާއަކަށް ތަނަވަސްކަން ލިބުމުގެ މަގުފަހިވާނެކަން ރައީސް އެދުވަހުވެސް ފާހަގަކުރައްވާފައިވެއެވެ.

206 މަޝްރޫޢު ދިވެހި ކުންފުނިތަކަށް، މާލީ ފައިދާ ރައްޔިތުންނަށް

ދިވެހި ފުލުހުންގެ ޚިދުމަތުން އާންމުކުރި ތަފާސްހިސާބުތަކަށް ބަލާއިރު، މިދިޔަ މަހު (އޮކްޓޯބަރު) ހުޅުމާލެއިން ޖުމްލަ 520 އުޅަނދު ޓޯކޮށްފައިވާކަން ހާމަވެއްޖެއެވެ. މިއީ މާލެއާއި ހުޅުމާލޭގެ ކާރޫބާރޫ ބޮޑު މަގުތަކުގައި ޤަވާއިދާ ޚިލާފަށް ޕާކްކޮށްފައިވާ އުޅަނދުތައް ނެގުމަށް ފުލުހުން ކުރަމުންދާ މަސައްކަތުގެ ތެރެއިން ނެގުނު އުޅަނދުތަކެކެވެ.

ފުލުހުންގެ ތަފާސްހިސާބުތަކުން ދައްކާގޮތުން، މި 520 އުޅަނދުގެ ތެރޭގައި 425 ދެ ފުރޮޅުލީ އުޅަނދާއި، 95 ހަތަރު ފުރޮޅުލީ އުޅަނދު ހިމެނެއެވެ.

މިދިޔަ މަހު (އޮކްޓޯބަރު) ޓޯކުރި ދެ ފުރޮޅުލީ އުޅަނދުތަކުގެ ތަފާސްހިސާބު:

މިދިޔަ މަހު (އޮކްޓޯބަރު) ޓޯކުރި ހަތަރު ފުރޮޅުލީ އުޅަނދުތަކުގެ ތަފާސްހިސާބު:

ސެޕްޓެންބަރު މަހުގެ ތަފާސްހިސާބު:

ދިވެހި ފުލުހުންގެ ޚިދުމަތުން އާންމުކުރި ނިމިދިޔަ ސެޕްޓެންބަރު މަހުގެ ތަފާސްހިސާބުތައް ދައްކާގޮތުން، އެ މަހު ހުޅުމާލެއިން ޖުމްލަ 702 އުޅަނދު ޓޯ ކޮށްފައިވެއެވެ. އެގޮތުން ދެ ފުރޮޅުލީ 643 އުޅަނދާއި، ހަތަރު ފުރޮޅުލީ 59 އުޅަނދު ޓޯ ކޮށްފައިވެއެވެ.

ސެޕްޓެންބަރުމަހު ޓޯކުރި ދެ ފުރޮޅުލީ އުޅަނދުތަކުގެ ތަފާސްހިސާބު:

ސެޕްޓެންބަރުމަހު ޓޯކުރި ހަތަރު ފުރޮޅުލީ އުޅަނދުތަކުގެ ތަފާސްހިސާބު:

މާލެއިން 70 ސައިކަލު ޓޯކޮށްފި:

މީގެ އިތުރުން، މިމަހުގެ 4 ވަނަ ދުވަހު މާލޭގެ މަގުތަކުގައި ދަތުރުފަތުރަށާއި، ޕަބްލިކް ޓްރާންސްޕޯޓަށް ދަތިވާ ގޮތައް ޤަވާއިދާ ޚިލާފަށް ޕާކު ކޮށްފައި ހުރި 70 ސައިކަލެއް ފުލުހުން ވަނީ ޓޯކޮށްފައެވެ. މާލޭގެ ކާރޫބާރޫ ބޮޑު މަގުތަކުގެ ދެ ފަރާތުގައި ޤަވާއިދާ ޚިލާފަށް ގިނަ އުޅަނދުތައް ޕާކުކޮށްފައި ހުރުމުގެ ސަބަބުން ހިނގާ ބިނގާވެ އުޅޭ މީހުންނާއި، މަގު ބޭނުންކުރާ މީހުންނަށް ވަރަށް ބޮޑެތި ދަތިތަކާއި ކުރިމަތިލާން ޖެހެއެވެ. ޚާއްޞަކޮށް ޢާންމު ދަތުރުފަތުރަށް ބުރޫ އަރައެވެ.

ފުލުހުންގެ އިލްތިމާސް:

ދިވެހި ފުލުހުންގެ ޚިދުމަތުން ވިދާޅުވީ، ކަފިހި ހުރަސްތަކާއި ލައިން ދަމާފައިވާ ސަރަހައްދުތަކާއި، ގޯޅި ކަންމަތީގައި އާންމު ދަތުރުފަތުރަށް ދަތިވާ ގޮތަށް ޕާކް ކޮށްފައި ހުންނަ އުޅަނދުތައް ނެގުމުގެ މަސައްކަތް ކޮންމެ ދުވަހަކުވެސް ކުރަމުންދާ ކަމަށެވެ. ފުލުހުން ވަނީ، ކަފިހި ހުރަސްތަކާއި ލައިން ދަމާފައިވާ ސަރަހައްދުތަކާއި، ގޯޅި ކަންމަތީގައި ޕާކް ކުރުމުގެ ބަދަލުގައި ޕާކް ކުރުމަށްޓަކައި ޚާއްސަ ކޮށްފައިވާ ޒޯންތަކުގައި ޕާކް ކުރުމަށް ޚާއްސަ ސަމާލުކަން ދެއްވުމަށް އިލްތިމާސް ކުރައްވާފައެވެ.

މީގެ އިތުރުން، މާލޭގެ މަގުތަކުގެ ސަލާމަތާއި ރައްކާތެރިކަން ކަށަވަރުކޮށް، މަގުތައް ތަރުތީބު ކުރުމަށް ފުލުހުން ކުރަމުންދާ މަސައްކަތްތަކަށް އާންމުންގެ ފަރާތުން އެއްބާރުލުމަށް އެދިވަޑައިގެންފައިވާ ކަމަށްވެސް ފުލުހުން ވިދާޅުވިއެވެ. އަދި އެކަމުގައި ޢާންމުންގެ ފަރާތުން ލިބޭ އެހީތެރިކަމަށް ފުލުހުން ވަނީ ޝުކުރު އަދާކުރައްވާފައެވެ.

މިދިޔަ މަހު ހުޅުމާލެއިން 520 އުޅަނދު ޓޯކޮށްފި

ދިވެހިރާއްޖޭގެ ތަޢުލީމީ ދާއިރާ ހަރުދަނާކޮށް، ގިނަ ރަށްރަށުގެ ދަރިވަރުންނަށް ޒަމާނީ ވަސީލަތްތައް ޤާއިމުކުރުމުގެ މަޤްސަދުގައި، ތަޢުލީމީ ދާއިރާގެ 31 ބޮޑެތި މަޝްރޫޢެއް ކުރިއަށްގެންދިޔުމަށް އަމިއްލަ ކުންފުނިތަކާ ހަވާލުކޮށްފިއެވެ. މި މަޝްރޫޢުތަކުގައި ސޮއިކުރުމުގެ ރަސްމިއްޔާތު ބާސެލޯ ނަސަންދުރާގައި ވަނީ ބާއްވާފައެވެ.

މި ރަސްމިއްޔާތުގައި މަސައްކަތް ހަވާލުކުރުމުގެ އެއްބަސްވުންތަކުގައި ސޮއިކުރެއްވީ ތަޢުލީމީ ވުޒާރާއާއި ދިވެހިރާއްޖޭގެ އިސްލާމީ ޔުނިވަރސިޓީ (އައިޔޫއެމް) އަދި މަސައްކަތް ހަވާލުކުރެވުނު އަމިއްލަ ކުންފުނިތަކުގެ އިސްވެރިންނެވެ. މި މަޝްރޫޢުތަކުގެ ތެރޭގައި ސްކޫލްތަކުގެ ކްލާސްރޫމްތައް ތަރައްޤީކުރުމާއި، މަލްޓިޕާޕަސް ހޯލް ޤާއިމުކުރުމާއި، ސައިންސް ލެބްތައް ހެދުން ހިމެނެއެވެ. މީގެ އިތުރުން ބައެއް ރަށްރަށުގައި ދިވެހިރާއްޖޭގެ އިސްލާމީ ޔުނިވަރސިޓީގެ ކެމްޕަސްތަކާއި ހޮސްޓަލްތައް ތަރައްޤީކުރުމަށްވެސް އަމިއްލަ ކުންފުންޏަކާ ވަނީ ހަވާލުކޮށްފައެވެ. މި މަޝްރޫޢުތައް ހިންގުމުގެ ބޭނުމަކީ ރާއްޖޭގެ އެކި ކަންކޮޅުތަކުގައި ދިރިއުޅޭ ދަރިވަރުންނަށް އެކަށޭނެ ތަޢުލީމީ މާހައުލެއް ޤާއިމުކޮށް، މަތީ ތަޢުލީމުގެ ފުރުސަތުތައް ފުޅާކުރުމެވެ.

މި މަޝްރޫޢުތަކުގައި ހިމެނޭ ބައެއް މަސައްކަތްތައް ތިރީގައި މިވަނީއެވެ.

ތަޢުލީމީ ދާއިރާގެ މަޝްރޫޢޫތައް:

މަތީ ތަޢުލީމު ދެ މަރުކަޒުތައް ތަރައްޤީކުރުން:

ސްވިފްޓް އިންޖިނިއަރިން ޕްރައިވެޓް ލިމިޓެޑް:

 ށ. ފުނަދޫގައި އައިޔޫއެމްގެ ކެމްޕަސްތަކާއި ހޮސްޓަލްތައް ތަރައްޤީކުރުން.

 ޅ. ނައިފަރުގައި އައިޔޫއެމްގެ ކެމްޕަސްތަކާއި ހޮސްޓަލްތައް ތަރައްޤީކުރުން.

 ޅ. ހިންނަވަރުގައި އައިޔޫއެމްގެ ކެމްޕަސްތަކާއި ހޮސްޓަލްތައް ތަރައްޤީކުރުން.

 ތ. ވޭމަންޑޫގައި އައިޔޫއެމްގެ ކެމްޕަސްތަކާއި ހޮސްޓަލްތައް ތަރައްޤީކުރުން.

މި އެއްބަސްވުންތަކުގައި ސޮއިކޮށްފައިވަނީ އެކި ބެޗްތަކަށް ބަހާލައިގެންނެވެ. މި މަޝްރޫޢުތައް ނިމުމުން ރާއްޖޭގެ ތަޢުލީމީ ދާއިރާއަށް ކުރިއެރުންތަކެއް ލިބި، ދަރިވަރުންނަށް ފަހި މުސްތަޤްބަލެއް ކަށަވަރުވެގެންދާނެކަމަށް ބެލެވެއެވެ.

Featured Main

ތަޢުލީމީ ދާއިރާގެ 31 މަޝްރޫޢު އަމިއްލަ ކުންފުނިތަކާ ހަވާލުކޮށްފި

އައްޑޫ ސިޓީގެ ހިތަދޫ އަދި ފޭދޫގައި ޕާސްޕޯޓު އަދި އައިޑީ ކާޑުގެ ޚިދުމަތް ރަސްމީކޮށް ފަށައިފިއެވެ. މި ޚިދުމަތްތައް ފައްޓަވައި ދެއްވީ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު، އައްޑޫ ސިޓީގެ ރައްޔިތުންނާ ބައްދަލުކުރެއްވުމަށް އައްޑޫ ހައި ސްކޫލްގައި ބޭއްވެވި ޚާއްސަ ޖަލްސާއެއްގައެވެ.

މި ހިދުމަތްތައް ފެށުމުގެ ރަސްމިއްޔާތުގައި، ފޭދޫގައި އައިޑީ ކާޑު ދޫކުރުމުގެ ޚިދުމަތް ފައްޓަވައި ދެއްވީ މިނިސްޓަރ އޮފް ސިޓީސް، ލޯކަލް ގަވަމަންޓް އެންޑް ޕަބްލިކް ވޯކްސް އާދަމް ޝަރީފެވެ. އަދި ފޭދޫގައި ޕާސްޕޯޓު ދޫކުރުމުގެ ޚިދުމަތް ފައްޓަވައި ދެއްވީ އިމިގްރޭޝަން ކޮންޓްރޯލަރ އަޙްމަދު ފަސީހެވެ. ހިތަދޫގައި ޕާސްޕޯޓު ދޫކުރުމުގެ ޚިދުމަތް ވެސް ފައްޓަވައި ދެއްވީ އިމިގްރޭޝަން ކޮންޓްރޯލަރ ފަސީހެވެ. (މި ރަސްމިއްޔާތުގެ ތެރެއިން ނެގި ފޮޓޯއެއް. --- ވަގުތު އިމޭޖަސް: އިބްރާހިމް ޝާބިލް)

ދިވެހި ޕާސްޕޯޓުގެ ޚިދުމަތް ރާއްޖޭގެ އެންމެހައި އަތޮޅުތަކަށް ފުޅާކުރުމުގެ މަޝްރޫއަކީ، ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ރިޔާސީ ވައުދުފުޅެކެވެ. އައްޑޫ ސިޓީގައި މި ހިދުމަތްތައް ފެށުމާއެކު، އެމަނިކުފާނުގެ ވައުދުފުޅު ފުއްދުމަށް އިތުރު ފިޔަވަޅެއް ވަނީ އެޅިފައެވެ.

މި ހިދުމަތްތައް މިހާރު ރާއްޖޭގެ ހުރިހާ އަތޮޅެއްގައި ވަނީ ފަށާފައެވެ. މާލޭގެ އިތުރުން ހުޅުމާލެ ފުރަތަމަ ފިޔަވައްސާއި ދެވަނަ ފިޔަވަހީގެ އިތުރުން ވިލިމާލޭގައި ވެސް ޕާސްޕޯޓްގެ ޚިދުމަތް ވަނީ ދޭން ފަށާފައެވެ. މިކަމުގެ ސަބަބުން ދަތުރުފަތުރާއި ކާޑު ހެއްދުމުގެ ކަންކަން ފަސޭހަވެ، ރައްޔިތުންނަށް ލިބޭ ފަސޭހަތައް އިތުރުވެގެންދާނެ ކަމަށް ސަރުކާރުން ވިދާޅުވެއެވެ.

ހިތަދޫގައި ޕާސްޕޯޓު، ފޭދޫގައި އައިޑީ ކާޑާއި ޕާސްޕޯޓުގެ ހިދުމަތް ފަށައިފި

ރާއްޖެއަށް 1988 ވަނަ އަހަރު ދިން އުދުވާނީ ހަމަލާގައި ގައުމަށްޓަކައި ޝަހީދުވި ކޯޕްރަލް ޝަހީދު ހުސައިން އާދަމްގެ ހަނދާނުގައި، ކުޅުދުއްފުށި ސިޓީގައި ހަދާފައިވާ ހަނދާނީ ބިނާ، ރަސްމީކޮށް ހުޅުވައިފިއެވެ. މި ބިނާ ހުޅުވައިދެއްވީ، ޝަހީދު ހުސައިން އާދަމް އެންމެ ފަހުން އެރަށުން ފުރާވަޑައިގެންނެވި ކުރީގެ ބަނދަރު ސަރަހައްދުގައި ހަދާފައިވާ އެކަމަށް ޚާއްސަކޮށް ބޭއްވި ރަސްމިއްޔާތެއްގައެވެ.

މި ރަސްމިއްޔާތުގައި ބިނާ ހުޅުވައިދެއްވީ ކުޅުދުއްފުށީ ސިޓީގެ މޭޔަރު މުހައްމަދު އާތިފް އަދި ޝަހީދު ހުސައިން އާދަމުގެ އާއިލާގެ ފަރާތުން އަހުމަދު އާދަމް، އައިޝަތު ޔުމްނާ އަހުމަދު، އަދި ފާތިމަތު ނީމް އަބްދުއްރަޝީދުއެވެ.

ޝަހީދު ހުސައިން އާދަމްގެ ހަނދާނުގައި ބަހައްޓާ މި ބިނާ ހަދަން ފެށީ މިދިޔަ އަހަރުގެ ފަހުކޮޅުގައެވެ. އެ ބިނާގެ މައިގަނޑު ބަޔަކީ ޝަހީދު ހުސައިން ބޭނުންކުރެއްވި އޭކޭ-47 ބަޑީގެ ހަތް ފޫޓުގެ ނަކަލެކެވެ. މީގެ އިތުރުން، ޝަހީދު ހުސައިން އާދަމް އެ ދުވަހު ހުންނެވި ގޭޓަށް ވަޒަން އަރާފައި ހުރި ގޮތަށް، އެ ގޭޓުގެ ދެފަރާތުގެ އަރިމަތީގައި ހުންނަ ޕެޓާންގެ ނަކަލެއް ވެސް ބިނާގައި ހިމެނޭނެ ކަމަށް ކައުންސިލުން ބުނެއެވެ.

ބިނާގެ ފަރުމާ ހުންނާނީ ރައުންޑައަބައުޓެއްގެ ތެރޭގައެވެ. މި ބިނާއާ ގުޅިގެން ފެހިކުލަ އާއި ރަތްކުލައިގެ ގަސްގަހުން ލޭންޑްސްކޭޕިންގެ މަސައްކަތް ވެސް ކޮށްފައިވެއެވެ. ބިނާގެ ފްލޯ ހުންނާނީ ވިދާ ގޮތަކަށް ފަރުމާކޮށްފައެވެ. އެ ބިނާ އިން ދައްކައިދެނީ ދިވެހި ގައުމުގެ ދިފާއުގައި ހަމަލާ ދިނުމަށް އެ ދުވަހު އޭނާ ގެންގުޅުއްވި ބަޑިއާ ދުޝްމަނުގެ ހަމަލާތަކުން ޝަހީދުވެގެން ވެއްޓި ވަޑައިގެންނެވި ތަނެވެ.

އެ ހަނދާނީ ބިނާ ފަރުމާކޮށް، ބިނާ ހެދުމަށް ޖުމްލަ ނުވަ ލައްކަ ރުފިޔާ ހަރަދުކުރީ ކުޅުދުއްފުށި ސިޓީ ކައުންސިލްގެ ބަޖެޓުންނެވެ. ހަނދާނީ ބިނާގެ ނަން ބޯޑު ހަރުކުރުން ނޫން ހުރިހާ މަސައްކަތެއް މިހާރު ނިމިފައިވާއިރު، މިހާރު ކުރިއަށްދަނީ ވަށް ބުރު ވަށައި މަގު ތައްޔާރުކުރުމުގެ މަސައްކަތެވެ.

ނަސްރުގެ ދުވަސް ފާހަގަކުރަނީ 1988 ވަނަ އަހަރުގެ ނޮވެންބަރު މަހުގެ ތިންވަނަ ދުވަހު ދިވެހި ހާއިނުންނާއި ބޭރުގެ ނިރުބަވެރި ޖަމާއަތެއް ގުޅިގެން ދިން ކުއްލި ހަމަލާއިން ދިވެހި ސިފައިންނަށް ނަޞްރު ލިބުނު ދުވަސް ފާހަގަކުރުމުގެ ގޮތުންނެވެ. ކުޅުދުއްފުށި ސިޓީއަށް އުފަން ކޯޕްރަލް ޝަހީދު ހުސައިން އާދަމް ޝަހީދުވީ، ވެރިރަށް މާލެއަށް ދިން ނުރައްކާތެރި ހަމަލާގައި ސިފައިންގެ މައި މަރުކަޒު ދިފާއުކުރުމުގައި ހުންނަވަނިކޮށެވެ. އޭނާގެ މި ބޮޑު ގުރުބާނީގެ ހަނދާން އާކޮށް ދިވެހި ގައުމަށް ޓަކައި އެ ދުވަހު އެޅުއްވި ފިޔަވަޅުތަކުގެ އަގު ވަޒަންކުރުމުގެ ގޮތުން މި ބިނާ ހެދުމަކީ، ދިވެހިރާއްޖޭގެ ދިފާއުގައި ޝަހީދުވި ހުސައިން އާދަމްގެ ހަނދާން އާކުރާނެ މުހިންމު ފިޔަވަޅެކެވެ.

ޝަހީދު ހުސައިން އާދަމްގެ ހަނދާނީ ބިނާ ކުޅުދުއްފުށީގައި ރަސްމީކޮށް ހުޅުވައިފި

ޖޫނިއާ އަންހެން ސިންގަލްސްގެ ޗެމްޕިއަންކަން ހޯދީ އިންޝާ އިކްލީލް އައްބާސް އެވެ. ފައިނަލްގައި އިންޝާ ވާދަކުރީ އައިޝަތު އަލީޝާ ނާފިއު އާއި ދެކޮޅަށެވެ. މި މެޗު އިންޝާ ކާމިޔާބުކުރީ 18-17 ގެ ހަނި ނަތީޖާއަކުންނެވެ. މި ކެޓަގަރީގެ ތިންވަނަ ހޯދީ އައިޝަތު މައިލާހް އާދަމް ޒާހިރާއި ވާދަކޮށް 25-0 ގެ ތަފާތަކުން މެޗު ކާމިޔާބުކުރި ޒުލެއިހާ ލީން އެވެ.

ޖޫނިއާ ފިރިހެން ޑަބަލްސް އިވެންޓުގެ ޗެމްޕިއަންކަން ހޯދީ އަހުމަދު މައިޝާން އާއި އަލީ އަހްކަމް އާދަމްގެ ޕެއާއެވެ. މައިޝާން އާއި އަހްކަމް ފައިނަލްގައި ވާދަކުރީ އަހުމަދު ޝަމާލް ސައުދުﷲ އާއި އަބްދުﷲ ކިޔާންގެ ޕެއާއާއި ދެކޮޅަށެވެ. މި މެޗު މައިޝާން އާއި އަހްކަމްގެ ޕެއާ ކާމިޔާބުކުރީ 22-7 ގެ ސްކޯއަކުންނެވެ. މި ކެޓަގަރީގެ ތިންވަނަ ހޯދީ މުހައްމަދު ޒީހާން އާއި މީކައިލް ބިން މަދަދުﷲގެ ޕެއާއިންނެވެ. ޒީހާން އާއި މީކައިލްގެ ޕެއާއިން އެ މެޗު ކާމިޔާބުކުރީ އަބްދުލްމާލިކް ހަސަން ލަތީފާއި އަހުމަދު ނައިސަމް ނިސާހްގެ ޕެއާ 13-7 ގެ ސްކޯއަކުން ބަލިކޮށްގެންނެވެ.

ޖޫނިއާ އަންހެން ޑަބަލްސް އިވެންޓުގެ ޗެމްޕިއަންކަން ހޯދީ އިންޝާ އިކްލީލް އައްބާސް އާއި އައިމިނަތު ކައިސާ ބިންތް އަބުދުﷲގެ ޕެއާއިންނެވެ. ކައިސާއާއި އިންޝާގެ ޕެއާ މި މެޗު ކާމިޔާބުކުރީ އައިޝަތު އަލީޝާ ނާފިއު އާއި ސޯފިއާ ސުނާން ޝާކިރުގެ ޕެއާ 25-0 ން ބަލިކޮށްގެންނެވެ. މި ކެޓަގަރީގެ ތިންވަނަ ހޯދީ މައިލާ އާދަމް ޒާހިރާއި ނީމް ނަސީމްގެ ޕެއާއެވެ. މައިލާ އާއި ނީމް އެ މެޗު ކާމިޔާބުކުރީ މަރިޔަމް ޝައުން އާއި ފާތިމަތު ޒާޝްގެ ޕެއާ 25-0 ން ބަލިކޮށްގެންނެވެ.

ކެރަމް ކޮމިއުނިޓީ ޝީލްޑް މުބާރާތުގެ ޖޫނިއާ ކެޓަގަރީގައި ޖުމްލަ ހަތަރު އިވެންޓް ހިމެނެއެވެ. އޭގެތެރެއިން ޖޫނިއާ ފިރިހެން ސިންގަލްސްގައި 39 ބައިވެރިން ވާދަކުރިއިރު، ޖޫނިއާ އަންހެން ސިންގަލްސްގައި 20 ކުޅުންތެރިން ވާދަކުރިއެވެ. އަދި، ޖޫނިއާ ފިރިހެން ޑަބަލްސްގައި 40 ކުޅުންތެރިން ވާދަކުރިއިރު، އަންހެން ޑަބަލްސްގައި 10 ކުޅުންތެރިން ވާދަކުރިއެވެ. މި މުބާރާތުގެ އެހެނިހެން އިވެންޓްތައް ކުރިއަށްދާނެކަމަށް ކެރަމް އެސޯސިއޭޝަން އޮފް މޯލްޑިވްސްއިން މައުލޫމާތު ދެއެވެ.

ކެރަމް ކޮމިއުނިޓީ ޝީލްޑް: ޖޫނިއާ އިވެންޓްތަކުގެ ޗެމްޕިއަންކަން މައިޝާން އާއި އިންޝާއަށް

ނަސްރުގެ ދުވަހާ ގުޅިގެން ޖުމްހޫރީ މައިދާނުގައި ބޭއްވި ޚާއްސަ އަސްކަރީ ހުށަހެޅުން ފެށުމުގެ ގޮތުން ވާހަކަފުޅުދައްކަވަމުން، ޗީފް އޮފް ޑިފެންސް ފޯސް މޭޖަރ ޖެނެރަލް އިބްރާހިމް ޙިލްމީ ވިދާޅުވީ، ރައީސުލްޖުމްހޫރިއްޔާ ޑރ.މުހައްމަދު މުޢިއްޒުއަކީ އަސްކަރިއްޔާގެ ޤާބިލްކަން އިތުރުކުރުމަށް ގިނަ މަސައްކަތްތަކެއް ކުރައްވާ، އަދި ސިފައިންގެ ގުރުބާނީގެ އަގުވަޒަންކުރައްވާ ލީޑަރެއްކަމަށެވެ.

ޗީފް އޮފް ޑިފެންސް ފޯސްގެ ވާހަކަފުޅުގައި 1988 ވަނަ އަހަރުގެ ނޮވެމްބަރުމަހުގެ 3 ވަނަ ދުވަހު ރާއްޖެއަށް ބަޔަކު ދިން އުދުވާނީ ހަމަލާއިން ޤައުމު ސަލާމަތްކުރުމަށް ސިފައިންވި މަތިވެރި ޤުރުބާނީގެ ހަދާންތައް އައުކުރެއްވިއެވެ. އަދި އެއީ ދުވަހަކުވެސް ފަނޑުވެގެންނުދާނެ ދީނީ އަދި ޤައުމީ ޚިދުމަތެއްކަމަށް މޭޖަރ ޖެނެރަލް ޙިލްމީ ފާހަގަކުރެއްވިއެވެ.

މީގެއިތުރުން، ޗީފް އޮފް ޑިފެންސް ފޯސްގެ ވާހަކަފުޅުގައި ވަނީ މިދިޔަ އަހަރުތަކުގައި ނަސްރުގެ ދުވަސް ވަރަށް އާދައިގެ ގޮތެއްގައި ފާހަގަކުރަމުން އައި އައުން ރައީސުލްޖުމްހޫރިއްޔާ ޑރ،މުހައްމަދު މުޢިއްޒު ބަދަލުކޮށްލާފައިވާކަން ފާހަގަކުރައްވާފައެވެ. އެގޮތުން މިދުވަހަކީ ޤައުމުގައި އެންމެ ކުލަގަދަކޮށް ފާހަގަކުރެވޭ ދުވަހެއްގެ ގޮތުގައި ރައީސުލްޖުމްހޫރިއްޔާ ހައްދަވާފައިވާކަން ޗީފް އޮފް ޑިފެންސް ފޯސް ފާހަގަކުރެއްވިއެވެ. އަދި ރައީސުލްޖުމްހޫރިއްޔާ ޑރ.މުހައްމަދު މުޢިއްޒުއަކީ ސިފައިންގެ މަތިވެރި ޚިދުމަތުގެ އަގުވަޒަންކުރައްވާ ލީޑަރެއްކަމަށްވެސް ޗީފް އޮފް ޑިފެންސް ފޯސް ވިދާޅުވިއެވެ.

"އެމަނިކުފާނަކީ ސިފައިންގެ މަތިވެރި ގުރުބާނީގެ އަގުވަޒަންކުރައްވާ ލީޑަރެއް. އެދުވަހު މި ޤައުމުގެ މިނިވަންކަން ދިފާޢުކުރުމަށްޓަކައި ޝަހީދުވި ފަރާތްތަކުގެ އަގުވަޒަންކުރައްވާ ލީޑަރެއް" ޗީފް އޮފް ޑިފެންސް ފޯސް ވިދާޅުވިއެވެ.

ޗީފް އޮފް ޑިފެންސް ފޯސްގެ ވާހަކަފުޅުގައި ވަނީ ދިވެހިރާއްޖޭގެ މިނިވަންކަން ދިފާއުކުރެވޭނެ ޤާބިލްކަން ދިވެހި އަސްކަރިއްޔާއަށް ހޯއްދަވައިދެއްވައި، ފާއިތުވި މާޒީގައި ދިވެހިން ސިފައިންވި މަތިވެރި ގުރުބާނީގެ އަހު ވަޒަންކުރައްވާތީ ސިފައިންނާއި ސިފައިންގެ އާއިލާތަކާއި އެންމެހާ ދިވެހިންގެ ނަމުގައި ރައީސުލްޖުމްހޫރިއްޔާއަށް ޝުކުރު ދަންނަވާފައެވެ.

ޗީފް އޮފް ޑިފެންސް ފޯސް ވިދާޅުވީ ނޮވެމްބަރު 3 ގެ ހާދިސާއިން ލިބޭ އެއް ފިލާވަޅަކީ މިނިވަންކަން ދިފާއުކުރުމަށް އަބަދުވެސް ތައްޔާރަށް އޮންނަ އަސްކަރީގޮތުން ޤާބިލް ފައުޖެއް އޮތުމުގެ މުހިއްމުކަންކަމަށެވެ. އަދި ރައީސުލްޖުމްހޫރިއްޔާ ގެންދަވަނީ އަސްކަރިއްޔާއަށް މީގެކުރިން ގެނެސްފައިނުވާފަދަ ތަރައްޤީއާއި ކުރިއެރުން ގެނެސްދެއްވަމުންކަމަށްވެސް ޗީފް އޮފް ޑިފެންސް ފޯސް ވިދާޅުވިއެވެ. ރައީސުލްޖުމްހޫރިއްޔާ ދިވެހި އަސްކަރިއްޔާ ތަރައްޤީކުރައްވަމުން ގެންދަވަނީ މިނިވަން އަދި އަމިއްލަ ބާރުވެރި ޤައުމެއްގެ ގޮތުގައި ރާއްޖެ ބޭއްވުމުގެ މަތިވެރި މަޤްޞަދުގައިކަމަށްވެސް އޭނާ ވިދާޅުވިއެވެ. އަދި އެެރޮނގުން މިހާތަނަށް އަސްކަރިއްޔާއަށް ހޯއްދަވައިދެއްވާފައިވާ ކުރިއެރުންތަކުގެ މައްޗަށްވެސް ޗީފް އޮފް ޑިފެންސް ފޯސް އަލިއަޅުއްވާލެއްވިއެވެ.

ނަސްރުގެ ދުވަހާއި ގުޅިގެން ޖުމްހޫރީ މައިދާނުގައި ކުރިއަށްގެންދިޔަ އަސްކަރީ ހުށަހެޅުމުގައި ވަނީ ދިވެހި އަސްކަރިއްޔާއަށް އެންމެފަހުން ގެނެސްފައިވާ ވަޔާއި، ކަނޑާއި އެއްގަމުގައި ބޭނުންކުރާ ޒަމާނީ އަސްކަރީ އުޅަނދުތައް ދައްކާލާފައެވެ. އެގޮތުން ޑްރޯންއާއި، މަނަވަރާއި، އަރމަޑް ވެހިކަލްތައް ވަނީ މި ޚާއްސަ ހުށަހެޅުމުގައި ފެނިގެންގޮސްފައެވެ.

ރައީސް މުޢިއްޒުއަކީ ސިފައިންގެ ގުރުބާނީގެ އަގުވަޒަން ކުރައްވާ ލީޑަރެއް: ޗީފް އޮފް ޑިފެންސް ފޯސް

މީގެ 37 އަހަރު ކުރިން ރާއްޖެއަށް ދިން އުދުވާނީ ހަމަލާއާ ގުޅިގެން އިންޑިއާއިން ދިން އެހީތެރިކަމަކީ އެ ގައުމުގެ މަދަދުވެރިކަން ދިވެހީންނަށް ދާއިމަށް ހަނދާންކޮށްދޭ ދުވަސް ކަމަށް، ކުރީގެ ރައީސް އަބްދުالله ޔާމީން އަބްދުލްޤައްޔޫމް މިއަދު ވިދާޅުވެއްޖެއެވެ. އެމަނިކުފާނު މިހެން ވިދާޅުވެފައިވަނީ، ނަސްރުގެ ދުވަހުގެ މުނާސަބަތުގައި އެކްސް (ކުރީގެ ޓްވިޓަރ) ގައި ކުރެއްވި ޕޯސްޓެއްގައެވެ.

ރައީސް ޔާމީން ވިދާޅުވީ 3 ނޮވެންބަރު 1988 ގައި ރާއްޖެއަށް ނަސްރު ހޯދައިދިނުމުގައި އިންޑިއާއިން މުހިންމު ރޯލެއް ކުޅެފައިވާ ކަމަށާއި އިންޑިއާއިން އެދުވަހު ފޯރުކޮށްދިން މަދަދުވެރިކަން މިއަދުވެސް ހަދާންކޮށްދޭ ކަމަށެވެ.

ނޮވެމްބަރު 3 ގައި ހ. ހާޖަރާގޭ އަބްދުﷲ ލުތުފީ އިސްވެ، ދިވެހީންގެ މަދު ބަޔަކާ ގުޅިގެން ސްރީލަންކާގެ ޕްލޯޓް ޖަމާއަތުގެ 80 ވަރަކަށް މީހުން ގޮވައިގެން މާލެއަށް ދިން ކުއްލި ހަމަލާއިން ދިވެހީންނަށް ނަސްރު ލިބުނު ދުވަސް ކަމުގައިވާ ނޮވެމްބަރު މަހުގެ ތިންވަނަ ދުވަހަކީ، ޝުކުރުކުރަން ޖެހޭ ދުވަހެއް ކަމަށް ޔާމީން ފާހަގަކުރެއްވިއެވެ.

އެ ދުވަހަކީ ދިވެހީންގެ ލޭ އޮހޮރުވާލައި، ވެރިކަން ބަދަލުކުރަން ދިވެހީންގެ ބަޔަކު އަޑީގައި ތިބެ މަސައްކަތްކުރި ދުވަހެކެވެ. އެ ދުވަހު ސިފައިންގެ ވަރުގަދަ އަޒުމާއި ގުރުބާނީ ފާހަގަވެގެން ދިޔަކަންވެސް ރައީސް ޔާމީން ފާހަގަކުރެއްވިއެވެ. އެގޮތުން، އާދައިގެ ސިފައިންގެ ބޭކަލެއް ކަމަށްވާ ކޯޕްރަލް ހުސައިން އާދަމްގެ މަތިވެރި ޖިހާދުން ގައުމު ދިފާއުކުރުމުގައި މުޅި ސިފައިންގެ ލަޝްކަރަށް ފިލާވަޅު ނަގައިދިން ދުވަހެއްކަން އެމަނިކުފާނު ވަނީ ފާހަގަކުރައްވާފައެވެ.

ހަމަ އެފަދައިން، އެ ދުވަހަކީ ކުރީގެ ބްރިގޭޑިއާ ޖެނެރަލް އިބްރާހިމް މުހައްމަދު ދީދީގެ ހިތްވަރުގަދަ މަސައްކަތުން ސިފައިންގެ ހަތިޔާރު ގުދަން ސިފައިންގެ އަތުޖައްސައިދީ ވަރުގަދަ ރައްދު ހަމަލާތަކެއް ދިން ދުވަސް ކަމަށް ވެސް ރައީސް ޔާމީންގެ ޕޯސްޓުގައިވެއެވެ.

ނޮވެމްބަރު ތިނެއްގެ އުދުވާނީ ހަމަލާއާ ގުޅިގެން ރާއްޖެއަށް އަސްކަރީ އެހީތެރިކަން ދިން އިންޑިއާގެ ނަން ރައީސް ޔާމީން މިއަދު ފާހަގަކުރެއްވިއިރު، އެމަނިކުފާނަކީ ރާއްޖެ-އިންޑިއާ ގުޅުމަށް އެންމެ ބޮޑަށް ފާޑުވިދާޅުވާ އެއް ބޭފުޅާއެވެ. ކުރީގެ ސަރުކާރުގައި އިދިކޮޅުގައި އޮތް ޕީޕީއެމްއިން ވަނީ "އިންޑިއާ އައުޓް" ގެ ނަމުގައި ހަރަކާތެއް ހިންގައި، އިންޑިއާގެ އަސްކަރިއްޔާ ރާއްޖެއިން ފޮނުވާލުމަށް ގޮވާލާފައެވެ. އެ ހަރަކާތުގައި ރައީސް ޔާމީން ވެސް އިންޑިއާ ސަރުކާރަށް ވަރަށް ބޮޑަށް ފާޑުކިޔުންތައް އަމާޒުކުރެއްވިއެވެ.

މިއަދަކީ އިންޑިއާގެ މަދަދުވެރިކަން ދާއިމަށް ހަނދާންކޮށްދޭ ދުވަސް: ޔާމީން

ކޮންމެ ކައިވެންޏެއްގެވެސް އެންމެ މުހިންމު އެއް ބިންގަލަކީ ދެމަފިރިންގެ މެދުގައި އޮންނަ ލޯތްބާއި އެކުވެރިކަމެވެ. މި ގުޅުން ހަރުދަނާކޮށް، ދެމެހެއްޓުމަށްޓަކައި އެތައް ކަމެއް މުހިންމުވެއެވެ. މިފަދަ ކަންކަމުގެ ތެރޭގައި ދެމަފިރިން މެދުގައި އޮންނަ މަޖާޒީ ވާހަކަ ދެއްކުމާއި، ފޮޑި ޖެހުމަކީ ލޯބި އިތުރުކުރާ ކަމެއްތޯއަކީ ވިސްނާލުން މުހިންމު ސުވާލެކެވެ. މިއީ އެއްވެސް ޝައްކެއްނެތް ގޮތުގައި އެކި މީހުންނަށް ތަފާތު ގޮތްގޮތަށް ތަޖުރިބާ ކުރެވޭނެ އަދި އެކި ދިރިއުޅުންތަކަށް ތަފާތު އަސަރުތައް ކުރާނެ ކަމެކެވެ.

ދެމަފިރިންގެ މެދުގައި މަޖާޒީ ގޮތެއްގައި ވާހަކަ ދެއްކުމާއި، ފޮޑި ޖެހުމަކީ ގުޅުމަށް އާ ރޫހެއް ގެނެސްދޭ ކަމެކެވެ. އެއްފަރާތުން އަނެއް ފަރާތަށް އޮންނަ ލޯބި ހާމަކޮށްދިނުމުގެ ވަސީލަތެއްގެ ގޮތުގައި މިކަން ބޭނުންކުރެވިދާނެއެވެ. އެކުވެރިކަމާއި، މަޖާ ކަންކަމުގެ ތެރެއިން ގުޅުން އިތުރަށް ބަދަހިވެ، ދެފަރާތުންނަށްވެސް ހިތްހަމަޖެހުމާއި އުފާވެރިކަން ލިބިގެންދެއެވެ. ޒަވާޖީ ހަޔާތް ފޫހިވިޔަ ނުދިނުމަށް މިފަދަ ކަންކަން އެހީތެރިވެދެއެވެ. ހަޔާތުގެ ޒިންމާތަކާއި ފިއްތުންތަކުގެ ތެރެއިން، މަޖާޒީ ކުޑަ ވަގުތުކޮޅެއް ލިބުމަކީ ލޯތްބާއި އަޅާލުން އިތުރުކޮށްދޭނެ ކަމެކެވެ. އިސްލާމްދީނުގައިވެސް ރަސޫލުﷲ صلى الله عليه وسلم އެކަލޭގެފާނުގެ އަނބިކަނބަލުންނާއެކު މަޖާ ކުޅިވަރުތައް ކުޅުއްވިކަން ސުންނަތުން އެނގެއެވެ. މިއީ ދެމަފިރިންގެ މެދުގައި ލޯތްބާއި އެކުވެރިކަން އިތުރުކުރާނެ ކަމެއްކަން ދައްކުވައިދޭ ކަމެކެވެ. ހަޤީޤީ ލޯތްބާއި އަޅާލުން ހުރި ނަމަ، ފޮޑިޖެހުމަކީ ގުޅުން އިތުރަށް އާލާކޮށް، ދިރުވާލާނެ ކަމެކެވެ.

އެހެންކަމުން، ދެމަފިރިން މެދުގައި ފޮޑި ޖެހުމަކީ ލޯބި އިތުރުކުރާނެ ކަމެއްކަމަށް ބުނެވޭނީ އެކަމަށް އެކަށީގެންވާ ގޮތުގައި، ދެފަރާތުންވެސް އެކަން ޤަބޫލުކޮށް، ހައްދު ފަހަނަޅައިނުދާނެހެން ކުރާ ކަމެއްނަމައެވެ. ކައިވެނީގެ ލޯބި ދެމެހެއްޓުމަށްޓަކައި، އިހުތިރާމާއި، މުއާމަލާތުކުރުމާއި، އެކަކު އަނެކަކަށް ދޭ ސަމާލުކަމާއި، ޒިންމާދާރުކަމަކީ އެންމެ މުހިންމު ބަހާތަކެވެ. ފޮޑި ޖެހުމަކީ މި ބަހާތައް އިތުރަށް ފުރިހަމަކޮށްދޭނެ ވަސީލަތެކެވެ. އެކަން ކުރަންވާނީ ދެފަރާތުގެ މެދުގައި އޮންނަ އިހުތިރާމާއި ގާތް ގުޅުން ހަލާކުނުވާނެ ގޮތަށެވެ. މެދުމިނުގައި ކަންކަން ކުރުމަކީ ކޮންމެ ކަމެއްގައިވެސް މުހިންމު ކަމެކެވެ.

އިސްލާމީ އުސޫލުތަކުގެ ތެރެއިން ދިރިއުޅުން ބައްޓަންކުރުމަކީ މުހިންމު ކަމެކެވެ. ފޮޑި ޖެހުމަކީ ގުޅުން ހަލުވިކޮށްދޭ، އުފާވެރިކަން ގެނެސްދޭ ކަމެއް ކަމުގައި ވިޔަސް، އެއީ ލޯބީގެ ބިންގަލެއް ނޫނެވެ. ލޯބީގެ ބިންގަލަކީ ތެދުވެރިކަމާއި، ވަފާތެރިކަމާއި، އޯގާތެރިކަމާއި، ދެމެހެއްޓެނިވި އިހުތިރާމެވެ.

ދެމަފިރިން މެދުގައި މާގިނައިން ފޮޑި ޖެހުމަކީ ލޯބި އިތުރުވާ ކަމެއްތަ؟

ގްރެމީ އެވޯޑް ހޯދި މަޝްހޫރު ރެޕް ލަވަކިޔުންތެރިޔާ ޕިޓްބުލް އޭނާގެ "އައި އޭމް ބެކް އިންޑިއާ ޓުއާ" ކެންސަލް ކޮށްފުމުން އިންޑިއާގެ ސަޕޯޓަރުންގެ ގިނަ ބަޔަކު މާޔޫސްވެއްޖެއެވެ. އެތައް އަހަރަކަށް ފަހު އިންޑިއާއަށް އެނބުރި އައުމަށް ތައްޔާރުވަމުން އައި އޭނާގެ މި ޓުއާ އިއުލާނުކުރީ ހަފުތާއެއްހާ ދުވަސް ކުރިން ކަމުގައިވާއިރު، އެކަން ވެގެން ދިޔައީ އޭނާގެ ސަޕޯޓަރުންގެ މެދުގައި ވަރަށް ބޮޑު ތަރުހީބެއް ލިބުނު ކަމަކަށެވެ.

ބުކްމައިޝޯ އިން މިޑް-ޑޭ އަށް ނެރުނު ބަޔާނެއްގައި ބުނީ ޑިސެމްބަރު މަހުގެ ހަވަނަ ދުވަހު ގުރުގްރާމްގައި އަދި ޑިސެމްބަރު އަށް ވަނަ ދުވަހުގައި ހައިދަރުއާބާދުގައި ބޭއްވުމަށް ހަމަޖެހިފައިވާ ޕިޓްބުލްގެ އައި އޭމް ބެކް ޓުއާ ކެންސަލް ކޮށްފައިވާ ކަމަށެވެ.

މި ޝޯތައް ކެންސަލްވުމާ ގުޅިގެން، ޓިކެޓް ނަގާފައިވާ ފަރާތްތަކަށް އެސްއެމްއެސް، އީމެއިލް އަދި ވަޓްސްއެޕް މެދުވެރިކޮށް އެކަން އަންގާފައިވާ ކަމަށާއި، 8-10 ދުވަހުގެ ތެރޭގައި ފުލް ރިފަންޑް ލިބޭނެ ކަމަށްވެސް އެ ބަޔާނުގައި ބުނެފައި ވެއެވެ. މިއާއެކު އެތައް ބަޔަކު ދަނީ އެކަމާއި މެދު ހިތްހަމަނުޖެހުން ފާޅު ކުރަމުންނެވެ.

"ޓިމްބަރ"، "ފީލް ދިސް މޮމެންޓް" އަދި "އައި ނޯ ޔޫ ވޯންޓް މީ" ފަދަ ކާމިޔާބު ލަވަތަކުން މަޝްހޫރުވެފައިވާ މި ރެޕް ލަވަކިޔުންތެރިޔާ އެންމެ ފުރަތަމަ ޕާފޯމްކުރަން ހަމަޖެހިފައި އޮތީ ގުރުގްރާމްގެ ހުދާ ގްރައުންޑްގައެވެ. އަދި ދެވަނަ ޝޯ އޮތީ ހައިދަރުއާބާދުގެ ރާމޯޖީ ފިލްމް ސިޓީގައެވެ. ނަމަވެސް މި ހަރަކާތްތައް އިންތިޒާމް ކުރާ ފަރާތްތަކުން ވަނީ ކޮންސެޓްތައް ނުބާއްވާނެ ކަމަށް އަންގާފައެވެ.

ޕިޓްބުލްގެ އިންޑިއާ ޓުއާ ކެންސަލްކޮށްފި: ސަޕޯޓަރުން މާޔޫސްވެއްޖެ

ގއ. ކޮލަމާފުށީގެ ބިން ހިއްކުމުގެ މަޝްރޫޢުގެ %90 މަސައްކަތް ނިމިފައިވާކަމަށް މޯލްޑިވްސް ޓްރާންސްޕޯޓް އެންޑް ކޮންޓްރެކްޓިންގ ކޮންޕެނީ (އެމްޓީސީސީ) އިން ބުނެފިއެވެ. ސަރުކާރުން 2023 ވަނަ އަހަރުގެ އޮގަސްޓު މަހު އެ ކުންފުންޏާ ހަވާލުކުރި މި މަޝްރޫޢުގެ ދަށުން ބިން ހިއްކުމާއި، ހިއްކާފައިވާ ސަރަހައްދު ހިމާޔަތް ކުރުމުގެ މަސައްކަތް ނިމުމަކާ ގާތަށް ގޮސްފައިވާކަމަށް އެމްޓީސީސީން ހާމަކުރެއެވެ.

އެމްޓީސީސީއިން ބުނި ގޮތުގައި، މިހާރު ކުރިއަށްދަނީ ހިއްކާ ސަރަހައްދުގައި ބައުންޑްވޯލް ޖެހުމުގެ މަސައްކަތާއި ވެލި އެޅުމުގެ މަސައްކަތެވެ. މީގެ އިތުރުން ހިއްކާފައިވާ ސަރަހައްދުގައި ފެން ބޮޑުވިޔަ ނުދިނުމަށް ބައޮސްވެލްއެއް އެޅުމާއި، ސަރަހައްދު ހިމާޔަތްކުރުމަށް ބޮޑުހިލަ ޖެހުމުގެ މަސައްކަތްވެސް ކުރިއަށްދާނެއެވެ.

ކޮލަމާފުށީ ކައުންސިލުން ފާހަގަކުރާ ގޮތުގައި، ރަށަށް ދިމާވެފައިވާ އެންމެ ބޮޑު އެއް މައްސަލައަކީ ބިމުގެ ޖާގައިގެ ދަތިކަމެވެ. މި މަޝްރޫޢުގެ ސަބަބުން 9.16 ހެކްޓަރުގެ ބިމެއް އިތުރުވެގެންދާނެ ކަމަށާއި، ރަށަށް ދިމާވެފައިވާ ބޯހިޔާވަހިކަމުގެ މައްސަލައަށް ހައްލު ލިބި، އިޤްތިޞާދީ މަސައްކަތްތަކަށް ފުރުޞަތުތައް ފަހިވެގެންދާނެ ކަމަށް ކައުންސިލުން ބުނެއެވެ.

މި މަޝްރޫޢުގެ މަސައްކަތްތައް ވީހާވެސް އަވަހަށް ނިންމާލުމަށް މަސައްކަތް ކުރަމުންދާ ކަމަށް އެމްޓީސީސީއިން ވަނީ ބުނެފައެވެ.

ގއ. ކޮލަމާފުށީގެ ބިން ހިއްކުމުގެ %90 މަސައްކަތް ނިމިއްޖެ: އެމްޓީސީސީ

ނަޞްރުގެ ދުވަހާ ގުޅިގެން މި އަހަރު ބާއްވާ ސިފައިންގެ އަސްކަރީ ހަރަކާތްތައް ޖުމްހޫރީ މައިދާނުގައި ބަލާލަން ޢާންމުންނަށް ތިން ދިމާއަކުން ވަދެވޭނެ ކަމަށް ދިވެހިރާއްޖޭގެ ޤައުމީ ދިފާޢީ ބާރު (އެމްއެންޑީއެފް) އިން މިއަދު ވިދާޅުވެއްޖެއެވެ. މި ހަރަކާތް އޮންނާނީ ނަޞްރުގެ ދުވަހުގެ ހަވީރު ޖުމްހޫރީ މައިދާނުގައެވެ.

އެމްއެންޑީއެފް އިން ޕީއެސްއެމް ނިއުސްއަށް މަޢުލޫމާތު ދެއްވަމުން ވިދާޅުވީ، ނަޞްރުގެ ދުވަހުގެ ހަވީރު 16:15 ގައި ސިފައިންގެ މި އަސްކަރީ ހުށަހެޅުންތައް ފެށުމަށް ހަމަޖެހިފައިވާއިރު، ޢާންމުންނަށް ޖުމްހޫރީ މައިދާން ސަރަހައްދަށް ވަދެވޭނެ އިންތިޒާމް 15:30 އިން ފެށިގެން ހަމަޖައްސާފައިވާ ކަމަށެވެ.

ޖުމްހޫރީ މައިދާނަށް ވަދެވޭނެ ތިން ދިމާ ހާމަކުރައްވަމުން އެމްއެންޑީއެފް އިން ވިދާޅުވީ، އަމީރު އަޙްމަދު މަގުގެ ދެކޮޅުންވެސް މައިދާނަށް ވަދެވޭނެ ކަމަށެވެ. އެގޮތުން، ދިފާޢީ ވުޒާރާ ހިންގާ ބިލްޑިންގެ ކަންމައްޗާއި، ކުރީގެ އެމްއެމްއޭ ހިންގި ބިލްޑިންގެ ހުޅަނގު ކަންމަތިން ވަނުމުގެ އިންތިޒާމް ހަމަޖެހިފައިވާނެއެވެ. މީގެ އިތުރުން، އިސްލާމީ މަރުކަޒާއި ސިފައިންގެ ކަންމައްޗާ ދެމެދުންވެސް ޢާންމުންނަށް ވަދެވޭނެއެވެ. މި ތަންތަނުން ވަނުމުގެ ކުރިން ސެކިއުރިޓީ ސްކްރީން ކުރުމުގެ އިންތިޒާމް ހަމަޖެހިފައިވާނެ ކަމަށްވެސް އެމްއެންޑީއެފް އިން މަޢުލޫމާތު ދެއްވިއެވެ.

ނަމަވެސް، ބޮޑުތަކުރުފާނު މަގުން މައިދާނަށް ޢާންމުންނަށް ނުވަދެވޭނެ ކަމަށާއި، އެ ދިމާލުން ވަދެވޭނީ ދަޢުވަތު އަރުވައިގެން ވަޑައިގަންނަވާ ބޭފުޅުންނާއި ޢިއްޒަތްތެރިންނަށް އެކަނި ކަމަށް ދިފާޢީ ބާރުން ހާމަކުރެއްވިއެވެ. މި ހަރަކާތްތަކަކީ ނަޞްރުގެ ދުވަސް ފާހަގަކުރުމުގެ ގޮތުން، ޤައުމީ ދިފާޢީ ބާރުގެ ޤާބިލުކަން ދައްކުވައިދިނުމަށް ބާއްވާ ހަރަކާތްތަކެކެވެ.

ނަޞްރުގެ ދުވަސް: ސިފައިންގެ އަސްކަރީ ހުށަހެޅުންތައް ބަލާލަން 3 ދިމާއަކުން ވަދެވޭނެ

ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު، ނިޝާން ޣާޒީގެ ޢިއްޒަތުގެ ވެރިޔާ، ރައީސް މައުމޫން ޢަބްދުލްޤައްޔޫމަށް ނޮވެމްބަރު 3ގެ ޝަރަފުގެ ޚާއްޞަ އައްޑަނައެއް އެރުވުމަށް ނިންމަވައިފިއެވެ. މީގެ އިތުރުން، ނޮވެންބަރު 3 ގެ ޢުދުވާނީ ޙަމަލާގައި ޝަހީދުވި ބޭފުޅުންގެ ޢާއިލާތަކަށް ހަނދާނީ އައްޑަނައެއް އެރުވުމަށްވެސް ރައީސުލްޖުމްހޫރިއްޔާ ވަނީ ނިންމަވާފައެވެ.

މި އައްޑަނަތައް އެރުވުން އޮންނާނީ، މިއަހަރުގެ ނަޞްރުގެ ދުވަހުގެ މުނާސަބަތުގައި މާދަމާ ހެނދުނު 9 ޖަހާއިރު، ސޯޝަލް ސެންޓަރުގައި ބާއްވަވާ ރަސްމީ ޖަލްސާގައެވެ. މިގޮތަށް ރައީސުލްޖުމްހޫރިއްޔާ ނިންމެވީ، ނޮވެންބަރު މަހުގެ 3 ވަނަ ދުވަހުގެ ޢުދުވާނީ ޙަމަލާގައި އޭރުގެ ރައީސުލްޖުމްހޫރިއްޔާ މައުމޫން ޢަބްދުލްޤައްޔޫމް ކުރެއްވި ތަޢުރީފު ޙައްޤު މަސައްކަތްޕުޅުތަކާއި އަދި އެދުވަހުގެ ޙަމަލާގައި ޝަހީދުވި ބޭފުޅުންގެ ޚިދުމަތުގެ އަގު ޤައުމީ ފެންވަރެއްގައި ދައުލަތުން ވަޒަންކުރެއްވުމުގެ ގޮތުންނެވެ.

1988 ވަނަ އަހަރުގެ ނޮވެމްބަރު މަހުގެ 3 ވަނަ ދުވަހަކީ، ބޭރުގެ ނިރުބަވެރި ބަޔަކު ރާއްޖެއަށް ދިން ޢުދުވާނީ ޙަމަލާއިން ރާއްޖެއަށް ނަޞްރު ލިބުނު ދުވަހެވެ. ދިވެހި 6 ޚާއިނުން، ނިރުބަވެރި ޖަމާޢަތަކާ ގުޅިގެން ދިން އެ ޙަމަލާގައި 19 ދިވެއްސަކު ޝަހީދުވިއެވެ. މި ޝަހީދުންގެ ތެރޭގައި ސިފައިންގެ 8 ބޭފުޅުންނާއި، ޢާންމުންގެ 11 ބޭފުޅުން ހިމެނެއެވެ.

ނަޞްރުގެ ދުވަހުގެ ރަސްމީ ޖަލްސާގައި ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ޤައުމާ މުޚާޠަބު ކުރައްވާނެއެވެ. މީގެ އިތުރުން، ދިފާޢީ ވަޒީރު މުޙައްމަދު ޣައްސާން މައުމޫންވެސް މިޖަލްސާގައި ވާހަކަފުޅު ދައްކަވާނެއެވެ.

ޙަބަރު